Panay News Philippines - BEST REGIONAL NEWSPAPER IN THE PHILIPPINES

YOU ARE HERE: Hublas TRAHEDYA SA DAGAT, 7 PATAY!

TRAHEDYA SA DAGAT, 7 PATAY!

E-mail Print PDF

Ni Ime Sornito

CONCEPCION, Iloilo – Naglab-ot na sa pito ang patay samtang walo naman ang pilason matapos nga nagkulob ang pumpboat nga ila ginasakyan bangod sa pag-igu sang pugada sa Sitio Punting, Brgy. Tambaliza diri pasado alas-dos sang hapon sang tinalikdan nga Sabado.

Sa pito ka napatay, anum gid diri ang mga bata nga ginkilala kanday Redan Rico, 2-anyos, Justin Rico, 4-anyos, Hanz Christopher Cañete, isa ka bulan, Jenia Cañete, 8-anyos, Rachelle Rico, 6-anyos kag Paulo Cañete,10-anyos kag isa naman ang tigulang nga amo si Aurea Rico, 72-anyos.

Samtang ginasulat ini nga balita, padayun naman nga ginabulong sa Jesus Colmenares District Hospital sa banwa sang Balasan sanday Elna Burdan, 40-anyos, April Rose Rico, 28-anyos, Alexander Rico, walo ka bulan, Kurt Guillen, 10-anyos, Maricel Cañete, 35-anyos, Gilbert Panican, 15-anyos kag Jeffrey Panican, 11-anyos samtang ang kapitan naman sang pumpboat nga si Marlon Panican, 37-anyos, ang ginabulong naman sa Sara District Hospital sa diin malubha pa ang kahimtangan sini.

Sa interbyu sang HUBLAS kay Executive Officer Jerry Bionat, Iloilo Provincial Disaster Risk Reduction and Management Council (PDRRMC), nahibaluan nga ang mga biktima ang lunsay residente sang Brgy. Salvacion, Concepcion, isa ka isla nga barangay.

Sunu pa kay Bionat nga nagpadulong ang mga magparyente sa Sitio Punting, Brgy. Tambaliza agud magpamista sakay sa ila ginrentahan nga pumpboat.

Apang, dugang pa ni Bionat, sang nagpauli na ang mga ini sa Brgy. Salvacion kag yara pa sa baybayon, gulpi lang nga nagwaswas ang mabaskug nga hangin kag nagbubo ang madamol nga ulan kon sa diin pugada na gali yadto.

Bangod sang mabaskug nga waswas sang pugada, ginpahayag ni Bionat nga mahimu nagkala-utod ang iban nga parte sang pumpboat nga gintunaan sang pagkulob sini kag pagka-anod sang mga biktima.

Nahibaluan pa sang HUBLAS nga nasapwan ang 12 sa 15 ka mga pasahero sa Brgy. Buaya, Carles, Iloilo sang mga mangingisda sang nagligad na nga Domingo sang hapon.

Gilayon sining mga mangingisda gindala sa ospital ang walo ka pilason samtang ang tatlo naman ka nauna na nga mga napatay nga sanday Redan, Justin kag Hanz Christopher ang gindala sa Balida Funeral Parlor sa Concepcion.

Si Jenia naman ang ulihi na lamang nga ginbawian sang kabuhi samtang ginabulong sa Jesus Colmenares District Hospital.

Ang tatlo naman nga sanday Aurea, Rachelle kag Paulo ang nasapwan kahapon lang sang aga sang mga katapo sang Provincial Bantay Dagat sa Brgy. Lantangan, Carles samtang nagapatigayon sila sang search and retrieval operation.

Ang nasambit naman nga pugada, paathag ni Bionat, indi dala sang bagyo Gorio nga nagwaswas sa iban nga bahin sang Kabisay-an lakip na sa pila ka mga banwa sakop sang northern Iloilo bangod nga nakalapaw na ini (Gorio) sang nagluntad ang trahedya.

Samtang, kahapon sang aga, personal nga nagpadulong sanday Gobernador Arthur Defensor Sr. kag Provincial Administrator Raul Banias sa Concepcion agud tan-awon ang sitwasyon sang mga biktima kag magpabutyag ang gobernador sang iya lubos nga simpatiya sa pamilya sang pito ka mga pasahero nagkalamatay.

Bilang pagpaumpaw naman sa pamilya sang nalisdan, nagtug-an sa mga ini ang gobernador nga magahatag sang bulig ang gobyerno probinsyal.

Sa kada bangkay, sunu kay Defensor, makabaton ang pamilya sini sang tag-P10,000 halin sa Provincial Social Welfare and Development Office(PSWDO). Magapangayo man ang gobernador sang dugang nga bulig halin sa Office of the Civil Defense. Luas diri, naghatag man sang iya personal nga bulig ang gobernador sa mga amay sang nagtaliwan nga kabataan.

Naghilibi-on naman nga ginpasalamatan sang mga nalisdan nga pamilya ang bulig pinansyal nga gintan-ay ni Defensor. (May dugang nga report halin kay Ray Cabarles/Capitol News)/H