Sa
hingyo nga ipaidalom sa state of imminent danger ang syudad
Treñas dayunon ang pagduso sini
sa NDCC
Ni Glenda SOLOGASTOA
Syudad sang ILOILO – Desidido nga igaduso
kag dayunon ni Mayor Jerry P. Treñas ang ginahingyo
sini nga ipaidalom sa state of imminent danger ang Syudad
sang Iloilo bangod sang El Niño.
Sa karon, suno kay Treñas, ginahanda
na ang mga kinahanglanon nga papeles agod gilayon nga iga-sumiter
ini sa National Disaster Coordinating Council (NDCC) paagi
sa Regional Disaster Coordinating Council (RDCC).
Nahibaluan nga ginduso ang ini nga hingyo
sa Sangguniang Panlalawigan (SP) agod magamit na ang bahin
sang calamity fund sang syudad nga pagagamiton agod mapahagan-hagan
ang epekto sang El Niño apang tubtob sa karon wala
ini naaprubahan.
May yara sang P60 milyon nga calamity fund
ang syudad para sa tuig 2010.
“For the meantime, sa mga pumoluyo nga
wala sang tubig, kadto sila sa mga konsehal especially sa
wala nag-aprob kay basi may tubi to sila,” pasaring
sang alkalde.
Suno sa alkalde, gamiton kontani ang pondo
para sa panggasaolina sa mga trak nga magadala sang mga water
tanks nga iga-deliver s mga barangay kag igabakal sang mga
kemikal para sa water treatment kag iban pa.
Dugang pa sang alkalde, kinahanglan nga matapna
na sa gilayon ang mga posible epektibo sang El Niño.
Magluwas sa problema sa kakulang sang tubig,
kinahanglanon man nga masiguro ang kalimpyo sang mga tubig-ilimnon
sang mga residente bangod kon indi mahimo makatuga ini sang
mga water-borne diseases nga makaapekto naman sa kapagros
sang mga pumoluyo.
Gintuad man sang alkalde nga santo sa report
sang city environment and natural resources office (CENRO)
nga yara na sa kritikal level ang suplay sang tubig sa Maasin
watershed kag sa production plants sang Metro Iloilo Water
District (MIWD) sa Maasin kag Sta Barbara, Iloilo./H
|
