Sa
ila pagserbe bilang BEI, siling ni de Venecia:
‘MANUNUDLO HATAGAN ABANSE NGA
SWELDO’
Dapat hatagan ang mga mununudlo nga magatawo
ukon magaserbe Board of Election Inspectors (BEI) sa mga election
precinct sang abanse ukon pauna nga 50 por ciento sang bayad
nga ginpain para sa ila extra service, siling ni senatorial
candidate Joey de Venecia III.
Kada eleksyon, ang mga manunudlo sang pungsod
amo ang ginatawag agod magserbe, "Sa klase sang dedikasyon
nga ila ginapakita, ang pinakanubo nga mahimo mahatag sang
gobyerno amo ang paghatag sa ila sang abanse sang tunga sang
ila sweldo," siling ni de Venecia.
Sa mga election hot spot, nabutang sa dako
nga risgo ang mga manunudlo, tuad ni de Venecia nga isa ka
IT businessman.
Indi problema ang pondo, suno pa sa anak ni
anay Speaker Jose de Venecia.
"May available nga pondo ang Department
of Budget and Management. Ang kwestiyon lang amo ang pag-release
sang pondo in advance."
Ang nagahilapit nga binotohay isa ka break
gikan sa naandan na nga mano-mano nga isipay sang boto. Sa
una nga kahigayonan, magapatigayon sang fully automated election
ang Commission on Elections. Ini nagakahulogan nga ang mga
manunudlo magapaidalom man sa paghanas agod masiguro nga mangin
masulhay ang dalagan sang eleksyon.
"Nagagasto ang gobyerno sang binilyon
sa pag-arkila sang mga bag-o nga election machines gikan sa
Smartmatic, ang kompaniya nga nagdaog sa bid nga maga-computerize
sang binotohay," suno kay de Venecia.
"Kon ang gobyerno maka-advance sa Smartmatic
sang binilyon ka pesos, mahimo man sini kag dapat maghimo
sang kaangay nga butang para sa aton mga manunudlo,"
dugang sini.
May mga kahigayonan sang nagligad nga ang
additional pay para sa mga manunudlo ang gin- release sinemana
kag iban binulan pagkatapos sang eleksyon. Indi ini dapat
matabo subong nga tion, siling ni Venecia.
Ipakigbato man sang ZTE-NBN whistleblower
ang pagdugang sang proteksyon sang manunudlo nga maga-duty
sa eleksyon.
Indi lamang dapat ang Armed Forces of the
Philippines ang magarantiya sang ila kaayohan, ang gobyerno
dapat maghatag man sang additional insurance para sa eleksyon
kag post-election period, suno kay Venecia. Ilabi na gid ang
yadtong magaserbe sa mga election hot spots.
Kon pwede, dapat hatagan man ang mga ini sang pagkaon, dugang
sini.
"Nothing is too good for our teachers,"
siling ni de Venecia. "Sila ang matuod nga baganihan
kag tagpangapin sang aton demokrasya. Ang extra service nga
ila ginahatag tion sang eleksyon ang indi mabakal ukon priceless."/H
|
