Ni Glenda Sologastoa

Probinsia sang ILOILO – Nakilal-an na ang duha ka miembro sang New People’s Army (NPA) nga napatay tion sang engkwentro sang ila grupo kag sang Armed Forces of the Philippines (AFP) sa Sitio Igbolo, Brgy. Igcabugao, Igbaras diri.

Ang bagay ang gintuad kahapon ni Capt. Lowen Gil Marquez, hepe sang Civil Relations Service sang AFP sa Western Visayas sa pagpakig-angot sang Hublas.

Suno kay Marquez, ginkilala ang duha ka mga NPA kanday Julito Carpio, legal ang edad sang Brgy. Bulok, Tubungan, Iloilo kag Jonel Camat, 23 anyos sang Brgy. Gines, Leon, Iloilo.

Sa madumduman, wala labot sa duha nga napatay, natirohan man kag napatay tion sang engkwentro ang isa ka amazona nga ginapatihan katapo sang League of Filipino Students (LFS).

Ang amo nga amazona ang wala pa makilal-an tubtob sa karon.

Suno pa dugang kay Marquez, nakilal-an si Camat paagi sa voter’s ID (gin-isyu sang munisipalidad sang Leon) nga nakuha sa paghinakop sini samtang nakilal-an naman si Carpio paagi sa pamilya sini sa Tubungan.

Dugang nga narekober kay Camat amo ang iya litrato nga naga-uyat sang M16 armalite nga arnas luthang kag may flag sang NPA.

Ang bangkay sa duha ang yara karon sa isa ka punerarya sa banwa sang Sibalom, Antique agod iga-autopsy.

Wala labot diri, nasalabat sa engkwentro ang mag-amay nga Jose Gabion, 40 sang amo nga duog kag ang duha sini ka mga kabataan nga sanday Joy Ann,12 kag Jessica, 10.

Wala naman sang may gin-report nga napilasan sa katapo sang militar./H

Iloilo gapangita bag-o nga IRC Warden

Probinsia sang ILOILO – Nagapangita karon sang bag-o nga warden para sa Iloilo Rehabilitation Center (IRC) sa Brgy. Nanga, Pototan diri ang gobyerno probinsial sang Iloilo.

Nahibaluan nga ang IRC karon ang yara sa pagdumala ni Iloilo Provincial Police Office (IPPO) director Senior Supt. Ricardo dela Paz bilang officer-in-charge kag ini ang may kapin sa 1,020 ka mga priso kag may kapin 500 ka gatos nga mga jailguard.

Ginadayaw naman ni Gobernador Niel D. Tupas, Sr. ang maayo nga performance kag pagdumala ni dela Paz sa IRC.

Apang, nagapati kag gin-ako niya nga ang pagdumala sang IRC nagakinahanglan sang full-pledge kag competent nga warden agod mag-monitor sang tanan nga nagakatalabo kag sitwasyon sa sulod sang IRC, sang mga priso kag mga jailguard.

Dugang pa niya nga kinahanglanon man ni dela Paz nga mag-concentrate sa iya sini trabaho bilang provincial director ilabi na sa paglagas sang mga kriminalidad ilabi na ang mga grupo sang mga holdaper subong man sang mga ilegal nga mga aktibidades sa bilog nga probinsia.

“Bal-an ta he could not do both things at the same time,” siling ni Tupas

Sa pihak naman nga bahin, sunod sa posisyon ni dela Paz amo si retired police officer Roberto Nufable nga amo man ang ikaduha nga opsyon ni Tupas.

Si Nufable amo ang consultant kag operations chief sang IRC.

Nagapati ini sang abilidad ni Nufable si Tupas apang kulang ini sang mga dokumento bilang kinahanglanon agod mangin isa ka warden.

“If ever may ara gusto mag apply, we hope he has the qualities just like dela Paz and Nufable,” siling pa ni Tupas./H